PrestaWiki.is

Íslenskir prestar segja gríðarlega margt óheiðarlegt, óheppilegt og heimskulegt. Sumir þeirra gera það þó vitaskuld ekki, á meðan aðrir virðast líta á það sem skyldu sína að bæta fyrir siðprýði þeirra fyrri.

Trúað fólk skilgreinir hinsvegar gjarnan trúarvellu sem eitthvað gott og vel meint, hvað sem orðin kunna að þýða sem streyma úr munnum prestanna. Þess vegna skiptir engu máli hversu rætin og ómerkileg leðjan er sem stundum er borin á borð, trúaðasta fólkið mun ekki sjá neitt að henni, leðjan er falleg í þeirra huga, því það trúir því að svona nokkuð sé hreinlega skilgreiningin á góðu og fallegu.

Trúarsannfæring er hinsvegar í rénum að því er mér sýnist og líklega er meirihluti þjóðarinnar í það minnsta ekki kristinnar trúar - ekki raunverulega, hvað sem trúfélagaskráningu líður. Það þarf hinsvegar að hjálpa sumum að taka ofan helgislepjugleraugun, til að þeir sjái í gegnum orðskrúð prestanna og verði meðvitaðir um að þar fara meðaljónar sem oftast vita ekkert meira um góða siði en aðrir landsmenn og eiga jafnvel í mestu erfiðleikum með að fara eftir eigin kennisetningum.

Í þeim tilgangi dettur mér í hug PrestaWiki.is. Það væri vel skipulagður vefur þar sem haldið væri utan um öll ofstopafull, ill og heimskuleg skrif verstu prestanna. Hægt væri að fletta upp prestunum og fá upp yfirlit yfir skrif þeirra, eða smella á efnistök og sjá hverjir hafa tjáð sig um þau. Prestar mættu þó að sjálfsögðu fá skýringar sínar eða leiðréttingar birtar á vefnum til að þeir njóti sannmælis - enda hafa þeir aldrei rangt fyrir sér, þessir pungar.

Orrahríðin í kringum tillögur mannréttindaráðs ein og sér er efni í svona vef. Óheiðarlegur vaðall presta í kringum það mál hefur verið svo sláandi að ljóst er orðið að trúin er engin trygging fyrir sómasamlegum og heiðarlegum málflutningi - að því gefnu að prestar séu trúaðir.

PrestaWiki gæti með tímanum orðið góð heimild sem gaman væri að glugga í aftur í tímann og virða fyrir sér helgiskrúðsklæddar lygarnar, leynimakkið og skætinginn - allt í nafni Krists.

Upp með Prestawiki.is. Hver ætlar að kaupa lénið og hefjast handa?

-

Auðvitað væri þessi vefur opnaður af hreinni gæsku í garð trúaðra, þar sem hann væri liður í að pína presta til að vanda sig og vera virkilega eins og þeir segja Krist hafa boðað. Sem sagt gott fyrir alla aðila.

Já, og gleðilega sólstöðuhátið, kæru lesendur.

Athugasemdir

[Arnar, 27.12.2010 kl. 12:28]

Þetta er reyndar alveg frábær hugmynd.

[Mofi, 28.12.2010 kl. 13:20]

Það er full ástæða til að prestar séu á varðbergi gagnvart því sem þeir láta frá sér; töluvert meiri ástæða en fyrir flesta aðra. Ég því miður tími ekki að styrkja þetta þó ég telji það gott málefni :)

[Kristinn Theódórsson, 29.12.2010 kl. 20:56]

Já, er það ekki, Arnar. Ég held það.

Koma svo, Mofi. Þú ert nú í þessum geira ;-)

[Matthías Ásgeirsson, 4.1.2011 kl. 23:33]

Bara ef að væri til einhver hópur sem gæti riggað upp svona síðu á augabragði!

[Kristinn Theódórsson, 4.1.2011 kl. 23:49]

Það hlýtur að vera til svona félagsskapur. Leggjum höfuðið í bleyti!